سألت من قبل عندما كنت أكتب تحت أسم كبير المتشردين ,,, ماذا تحبون في مصر وأقصد هنا مصركم وليس مصري الموازية …. والآن أكرر سؤالي منتظرا إجابة مقنعة فصيحة غير الإجابات الغير مقنعة بالمرة التي ترددونهم كأنكم نسخ معادة من برامج القناة الثالثة المصرية

انا هتكلم عن نفسي قبل ما أتكلم عن الناس انا بصراحة مش بحب حاجة في مصر أي حاجة غير نفسي بحب مصر لاني مصري غصب عني مش انا الي اخترت أكون مصري ومش هقدر اكون غير مصري حتي لو حصل وهاجرت وحصلت علي اي جنسية تانية أكيد هفضل من أصل مصري وهيعاملون في الدولة الي هحصل علي جنسيتها علي اني مصري وأكيد هدخل في صراع الولاء والانتماء علشان كده بس متمسك بمصر وبحاول اني اعيش فيها غير اني مش بحب الغربة رغم ان الفقر في الوطن غربة والغني في الغربة وطن ولكن من يعوضني عن أهل أعرف أن هذا الصراع سيظل بداخلي الي أن يحسمه احد بأجابة مقنعة أو استجيب لمطلب الهجرة أو افني دون ذلك أو ذاك

اما عنكم ايها السادة والسادات فأجابتكم الغير مقنعة تصيبني بكثير من الرغبة في العزلة أجابات غريبة تدهشني كل يوم من الشعب المصري

منكم من يجيب اصل بحب النيل… هو يعني مكنش في انهار في العالم غير النيل

والي بيحب الهرم ….. طيب وماله يعني صور الصين العظيم

والي بيحب أصحابه وميقدرش يبعد عنهم … طيب ما ممكن يبقالي اصحاب في اي مكان في العالم حتي اسرائيل

والي بيحب الحضارة والي بيحب التاريخ والي بيقول اصل مصر مهد الرسالات واسباب غريبة جدا جدا جدا كلها غير مقنعة بالمرة وغير مجدية في محاولة التغلب علي الصراع الداخلي المنطقي عند نص شباب جيلي علي الاقل

عموما انا هطرح نفس السؤال للمرة التالتة ليه بتحبوا مصر ….. طيب لو بتحبها من غير سبب عملت علشانها ايه وبلاش بالله عليكم حكاية نزلت مظاهرتين وعملت اضرابين ودخل المعتقل 3 مرات اصل مش دي التضحية ولا ده النضال ولا ده مقياس التفوق وياريت متعتبروش ان ده اقلال من الناس الي بتنزل مظاهرات بس عمر ما ده كان مقياس حب مصر ويقدر يوضح فكرتي الناس الي بتنزل وتقولكم فكرة المصالح السياسية الموجودة في المظاهرات والي بيمثل فيها الأغلبية العظمي من الشباب الي بيحبوا مصر بجد دور الأداة ليس أكثر